मुंबई प्रतिनिधी : महाराष्ट्रातील खाटीक समाज, मटण व्यापारी तसेच शेळी-मेंढी वाहतूक करणाऱ्या वाहतूकदारांवर होत असलेला छळ, विनाकारण अडवणूक, खोटे गुन्हे दाखल करणे, रस्त्यावर त्रास देणे आणि व्यवसायात अडथळे निर्माण करण्याच्या घटनांबाबत देवनार पशुवधगृह येथे महाव्यस्थापक डॉ.कलीम पाशा यांच्या दालनात प्रशासकीय अधिकाऱ्यांसोबत संयुक्त बैठक पार पडली. यावेळी हाजी अरफात शेख यांनी स्पष्ट शब्दांत सांगितले की, समाजावरील अन्याय कोणत्याही परिस्थितीत सहन केला जाणार नाही. व्यापारी, वाहतूकदार, खाटीक समाज तसेच या व्यवसायाशी संबंधित प्रत्येक घटकाच्या न्याय्य हक्कांसाठी राज्य मुस्लिम खाटीक समाज ठामपणे उभा आहे. या प्रश्नावर कायमस्वरूपी तोडगा निघावा, यासाठी संबंधित अधिकाऱ्यांसमोर मागण्या मांडण्यात आल्या. प्रशासनाने तातडीने कारवाई करून समाजाला न्याय द्यावा, अन्यथा समाजाच्या हक्कांसाठी लोकशाही मार्गाने तीव्र आंदोलन उभारण्यास आम्ही मागे हटणार नाही, असा इशाराही देण्यात आला. हाजी अरफात शेख म्हणाले की, “खाटीक समाज, वाहतूकदार, मटण व्यापारी तसेच या व्यवसायाशी निगडित प्रत्येक व्यक्तीच्या न्यायासाठी जेव्हा जेव्हा गरज भासेल, तेव्हा तेव्हा आम्ही रस्त्यावर उतरून संघर्ष करू. विनाकारण छळ करणाऱ्या कोणत्याही व्यक्ती किंवा संघटनेला कायद्याच्या चौकटीत उत्तर दिले जाईल. समाजाला न्याय मिळेपर्यंत हा लढा थांबणार नाही.” बैठकीत उपस्थित व्यापारी व समाजबांधवांनीही एकजुटीने अन्यायाविरुद्ध लढा देण्याचा निर्धार व्यक्त केला आणि शासनाने या गंभीर प्रश्नांची तातडीने दखल घेऊन ठोस निर्णय घ्यावा, अशी मागणी केली. या प्रसंगी बैठकीस देवनार पशुवधगृहाचे महाव्यस्थापक डॉ. कलिमपाशा ए. पठाण, संबधित प्रशासकीय अधिकारी, हिंदू खाटीक समाज, मुस्लिम खाटीक समाज, धनगर समाजाचे प्रतिनिधी, पशुधन वाहतूकदार, व्यापारी, विविध सामाजिक समाजबांधव तसेच राज्य मुस्लिम खाटीक समाजाचे पदाधिकारी मोठ्या संख्येने उपस्थित होते.

नरेंद्र वाबळे लोकप्रिय आमदार प्रशांत ठाकूर यांच्या वाढदिवसानिमित्त जाणीव एक सामाजिक संस्था पनवेल यांच्या वतीने “ऋतू हिरवा” या विशेष  कार्यक्रमाचे आयोजन करण्यात आले आहे. पावसाळ्याच्या विविध छटांचा अनुभव देणारा हा अनोखा सांस्कृतिक कार्यक्रम मंगळवार, दिनांक ४ ऑगस्ट २०२६ रोजी सायंकाळी ६.३० वाजता आद्य क्रांतिवीर वासुदेव बळवंत फडके नाट्यगृह, पनवेल येथे संपन्न होणार आहे.“फक्त पाऊसगाणी नाहीत तर पावसाच्या विविध २२ रूपांचा अनुभव देणारा” असा हा कार्यक्रम असून, रसिक प्रेक्षकांसाठी प्रवेश विनामूल्य ठेवण्यात आला आहे. या कार्यक्रमाची संकल्पना आणि निवेदन अनघा मोडक यांनी केले आहे.           आमदार प्रशांत ठाकूर यांच्या वाढदिवसानिमित्त आयोजित करण्यात आलेल्या या कार्यक्रमामध्ये संगीत, कविता, नाट्य आणि विविध कलाविष्कारांच्या माध्यमातून पावसाच्या विविध पैलूंना उजाळा देण्यात येणार आहे. जाणीव एक सामाजिक संस्था संस्थापक-अध्यक्ष तथा महापौर नितीन जयराम पाटील यांच्या मार्गदर्शनाखाली हा कार्यक्रम आयोजित करण्यात आला आहे. पनवेलमधील नागरिकांनी आणि कला रसिकांनी या कार्यक्रमाला उपस्थित राहून कार्यक्रमाचा आनंद घ्यावा, असे आवाहन आयोजकांकडून करण्यात आले आहे. मोफत प्रवेशिकासाठी महापौर नितीन जयराम पाटील जनसंपर्क कार्यालय- ९३२३२६६१६३, ८४५१८४२९१९, ९८२०६६६७६८, ९८१९६७६५१८

मुंबई, दि. ३० (क्रीडा प्रतिनिधी) – मुंबई क्रिकेट संघटनेत प्रशिक्षक आणि निवड समिती सदस्य म्हणून काम करणाऱ्या नव्या पिढीने कोणत्याही प्रकारच्या ‘मस्काबाजी’च्या मोहात न पडता गुणवत्तेलाच प्राधान्य द्यावे, असा स्पष्ट आणि परखड सल्ला हिंदुस्थानचे माजी कसोटीपटू संदीप पाटील यांनी दिला. जिमखान्याचा गौरव, वैभव आणि शान टिकवायची असेल, तर जिमखान्यातील जास्तीत जास्त गुणवंत खेळाडूंना संधी कशी मिळेल, याचाच विचार करा. असे झाले तर मुंबई क्रिकेट अधिक समृद्ध होईल, असे ते म्हणाले. शिवाजी पार्क जिमखान्याच्या वतीने मुंबई क्रिकेट संघाच्या मेंटॉरपदी संदीप पाटील यांची नियुक्ती झाल्याबद्दल तसेच जिमखान्याच्या सदस्यांची एमसीएच्या विविध संघांवर प्रशिक्षक आणि निवड समिती सदस्य म्हणून झालेल्या निवडीबद्दल आयोजित सत्कार सोहळ्यात ते बोलत होते. जिमखान्याच्या नऊ सदस्यांची एमसीएच्या विविध संघांवर वर्णी लागली आहे त्यानिमित्त या सत्कार सोहळ्याचे आयोजन करण्यात आले होते बालमोहन शाळेतून क्रिकेट खेळायला सुरुवात केली तेव्हा माझी आई म्हणायची, तू शिवाजी पार्क जिमखान्यासाठी खेळलास, तर आयुष्यात सर्व काही मिळवल्यासारखे होईल. त्या एका वाक्याने माझ्या मनात जिमखान्याबद्दल अपार आदर निर्माण झाला, असे सांगत पाटील यांनी आपल्या बालपणाच्या आठवणींना उजाळा दिला. जिमखान्याच्या पायऱ्यांवर बसून क्रिकेट पाहताना अजित वाडेकर, विजय मांजरेकर, रमाकांत देसाई, बाळू गुप्ते, सुभाष गुप्ते, पद्माकर शिवलकर आणि मनोहर हर्डीकर यांसारख्या दिग्गजांना जवळून पाहण्याची संधी मिळाली. त्यांना पाहता पाहताच क्रिकेटचे धडे मिळाले. हीच जिमखान्याची खरी परंपरा आणि ताकद आहे, असे ते म्हणाले. सध्याच्या जिमखान्याच्या कार्याचे कौतुक करताना त्यांनी प्रवीण अमरे आणि पदाधिकाऱ्यांचे अभिनंदन केले. जिमखाना योग्य दिशेने वाटचाल करत आहे. ही परंपरा अशीच पुढे सुरू राहावी आणि मुंबई क्रिकेटला सातत्याने नवे गुणवंत खेळाडू मिळावेत,अशी अपेक्षाही त्यांनी व्यक्त केली. आठ नव्या गुरूंचा गौरवमुंबई क्रिकेट असोसिएशनच्या विविध संघांवर प्रशिक्षक व निवड समिती सदस्य म्हणून निवड झालेल्या सुधाकर हरमळकर, प्रशांत सावंत, जयदीप पाल, आशिष महाडेश्वर, कल्पना मुरकर, अमित पागनीस, बिमेश शहा आणि जय धुरी या नव्या गुरूंचा शिवाजी पार्क जिमखान्याच्या वतीने विशेष सत्कार करण्यात आला.यावेळी जिमखान्याचे अध्यक्ष प्रवीण अमरे, कार्याध्यक्ष दीपक मुरकर, सरचिटणीस संजीव खानोलकर आणि सहसचिव सुनील रामचंद्रन यांच्यासह पदाधिकारी व सदस्य उपस्थित होते. उपस्थितांनी नव्या जबाबदारीसाठी सर्व प्रशिक्षक व निवड समिती सदस्यांचे अभिनंदन करून त्यांच्या भावी कारकिर्दीस शुभेच्छा दिल्या.

केतन खेडेकर रक्तदान हेच सर्वात श्रेष्ठ दान असून नागरिकांनी रक्तदान जरूर करावे. नियमित रक्तदान केल्याने आपण अनेक रुग्णाचा जीव वाचवू शकतो असा सामाजिक संदेश शिवसेना शिवडी विधानसभा विभाग प्रमुख शशिकांत निकम यांनी काळाचौकी येथील शिवाजी हॉल येथे आयोजित केलेल्या रक्तदान शिबिरात दिला. या शिबिरामध्ये मोठ्या संख्येने रक्तदात्यांनी रक्तदान करून आपले कर्तव्य बजावले. या शिबिरात प्रत्येक रक्तदात्यास उत्कृष्ट भेटवस्तू आणि सन्मानचिन्ह देऊन त्यांचा गौरव करण्यात आला रक्तदान हे सर्वात श्रेष्ठदान असून प्रत्येक नागरिकाचे सामाजिक कर्तव्य आहे. रक्तदान केल्यामुळे आपण एखाद्याचा जीव वाचवू शकतो. याच भावनेतून आम्ही रक्तदान शिबिराचे आयोजन केले असून यापुढे देखील आम्ही अशाच प्रकारे सामाजिक शैक्षणिक आणि क्रीडा विषय कार्यक्रमाचे आयोजन करणार असल्याची माहिती शिवसेना शिवडी विधानसभा विभागप्रमुख शशिकांत निकम यांनी दिली. प्रमुख पाहुणे म्हणून शिवसेनेचे खासदार मिलिंद देवरा, सभापती सचिन अहिर, माजी आमदार दगडू दादा सकपाळ, महिला विभाग प्रमुख रेश्मा गावकर सकपाळ, कुणाल प्रभुणे, सानिया लोकाधिकार सेनेचे पदाधिकारी देवेंद्र कदम, संतोष बामणे आणि सर्व शिवसैनिक आणि पदाधिकारी मोठ्या संख्येने उपस्थित होते.

मुंबई प्रतिनिधी आमदार भाई जगताप यांच्या भारतीय कामगार कर्मचारी महासंघ नेतृत्व करत असलेल्या आस्थापनापैकी महाराष्ट्र राज्य विद्युत वितरण कं.लि. (MSEDCL) रायगड विभागातील गोरेगाव व रोहा युनीटमधील कंत्राटी कामगारांना कायम कामगारांप्रमाणे ‘समान काम समान वेतन’ देण्यात यावे यासाठी भारतीय कामगार कर्मचारी महासंघातर्फे सन २०२० मध्ये ठाणे औद्योगिक न्यायालयात दावा क्र.१६/२० व १२/२०१८ दाखल केला होता. औद्योगिक न्यायालय ठाणे यांनी दि. १८ जुलै २०२४ रोजी महाराष्ट्र राज्य विद्युत वितरण कं. लि. गोरेगाव व रोहा युनिट मधील कंलाटी पद्धतीवर वर्षानुवर्षे काम करणाऱ्या कामगारांना कायमस्वरूपी कर्मचाऱ्यांप्रमाणे ‘समान काम समान वेतन’ देण्यात यावे तसेच त्यांच्या पगारातील तफावत सन २०१६ पासून ते आजतागायत द्यावी असा आदेश पारीत केला होता. या निर्णया विरोधात महाराष्ट्र राज्य विद्युत वितरण कं. लि. (MSEDCL) ने मुंबई उच्च न्यायालयामध्ये रिट पिटिशन ३१७०/२०२५ व ३१७२/२०२५ अंतर्गत दावा दाखल केला होता.भरती बंदीमुळे नियमित कर्मचाऱ्यांची रिक्त पदे कंत्राटी कर्मचाऱ्यांकडून भरून घेत असताना त्यांच्याकडून समान स्वरूपाचे काम करून घेतले जात असेल तर नियमित कर्मचाऱ्यांच्या वेतन श्रेणीतील किमान वेतन देणे बंधनकारक आहे असा निर्णय मा. उच्च न्यायालयाने दिला. मान्न, वेतन फरकाची थकबाकी काम सुरू झाल्यापासून नव्हे, तर औद्योगिक न्यायाधिकरणाकडे संदर्भ दाखल झाल्याच्या तारखेपासूनच मिळेल, असे स्पष्ट करत न्यायालयाने औद्योगिक न्यायाधिकरणाचा आदेश कायम ठेवत मुंबई उच्च न्यायालयाचे मा. न्यायमुर्ति श्री. संदीप व्ही. मारणे यांनी महावितरण व भारतीय कामगार कर्मचारी महासंघ यांच्या याचिकांवर हा निर्णय दिला. भा.का.क. महासंघाचे सचिव प्रकाश शिंदे व कायदेतज्ञ जी. आर. नाईक, के. टी. विश्वनाथन, महासंघाचे कायदेविषयक सल्लागार अॅड. जी. एस. बज साहेब व महासंघाची कोर्ट ब्रिगेड यांचे कामगारांनी मनःपूर्वक अभिनंदन केले. हा निर्णय देताना न्यायालयाने नमूद केले की, महावितरणने स्वतःच भरती बंदीमुळे मनुष्यबळाची कमतरता असल्याने कंत्राटी कामगार नियुक्त केल्याचे मान्य केले आहे. त्यामुळे हे कर्मचारी नियमित कर्मचाऱ्यांचीच कामे करत असल्याचे स्पष्ट होते. औद्योगिक न्यायाधिकरणाने नोंदविलेला हा निष्कर्ष चुकीचा असल्याचे दाखवण्यात महावितरण अपयशी ठरले. न्यायालयाने या प्रकरणात महाराष्ट्र कंत्राटी कामगार (नियमन व निर्मूलन) नियम, १९७१ मधील नियमावर विशेष भर दिला. या नियमानुसार कंत्राटी कामगार नियमित कर्मचाऱ्यांप्रमाणेच काम करत असतील तर त्यांना त्याच दराने वेतन देणे ही वैधानिक जबाबदारी आहे. त्यामुळे हा अधिकार केवळ ‘समान काम समान वेतन’ या घटनात्मक तत्त्वावर नव्हे तर थेट नियमांमधून मिळतो, असे न्यायालयाने याठिकाणी स्पष्ट केले. हा निर्णय कामगारांच्या बाजूने लागल्याने संपूर्ण कामगार वर्गाने भारतीय कामगार कर्मचारी महासंघाचे आणि आमदार भाई जगताप यांचे  मनापासून आभार मानले.

राणीबागेत ज्येष्ठ नागरिकांची प्रभातफेरी बंद, नागरिकांनी केला निषेध मुंबई प्रतिनिधी : वीरमाता जिजाबाई भोसले उद्यान अर्थात राणीबाग येथे ज्येष्ठ नागरिकांना सकाळी प्रभातफेरी करण्यास मज्जाव करण्यात आल्याने ज्येष्ठांमध्ये तीव्र नाराजीचे वातावरण आहे. या संदर्भात राणीबाग प्रभातफेरी समूहाचे श्री. अशोक भेके आणि मनसे नेते श्री. संजय नाईक, समाजसेवक श्री दिनेश कोलते यांनी उद्यान अधीक्षक श्री. त्रिपाठी यांची भेट घेऊन प्रभातफेरी पुन्हा सुरू करण्याची विनंती केली. मात्र ज्येष्ठ नागरिकांप्रती उदासीनता दाखवत त्यांनी ही विनंती फेटाळली. “ज्येष्ठांचा दबाव वाढत आहे” हे कारण देत ते प्रभातफेरी सुरू करण्याबाबत टाळाटाळ करत असल्याचा आरोप श्री. भेके यांनी केला. विशेष म्हणजे चौकशी केली असता प्रभातफेरी बंद करण्याचे कोणतेही लेखी आदेश वरून आले नसल्याचे समजते. बुधवारी महाराष्ट्र नवनिर्माण सेनेने या मुद्यावर उद्यान परिसरात आंदोलन केले होते. त्यानंतर त्रिपाठी यांनी चिडून प्रभातफेरी बंद करण्याचा निर्णय घेतल्याची चर्चा आहे. या विरोधात राणीबाग प्रभातफेरी समूहाच्या वतीने श्री. अशोक भेके यांनी महाराष्ट्र राज्याचे मुख्यमंत्री _श्री. देवेंद्र फडणवीस_ आणि मुंबईच्या महापौर _सौ. ऋतु तावडे_ यांना निवेदन सादर केले आहे. केंद्र सरकारच्या “आझादी का अमृत महोत्सव” आणि “फिट इंडिया” या अभियानाला हरताळ फासण्याचे काम येथे होत आहे, अशी खंत ज्येष्ठ नागरिक व्यक्त करत आहेत. जर त्वरित प्रभातफेरी सुरू न केल्यास ज्येष्ठ नागरिक तीव्र आंदोलन छेडतील, असा इशारा देखील भेके यांनी दिला आहे.

मुंबई प्रतिनिधी दिल्ली येथील जंतर-मंतरवर झालेल्या विद्यार्थ्यांवर अन्यायकारक मारहाणीच्या निषेधार्थ शिवसेना उभाटा, मनसे आणि काँग्रेस यांनी आज सभागृहात विद्यार्थ्यांना न्याय द्या यासाठी सभागृह सुरू होताच निषेध व्यक्त केला. यावेळी विद्यार्थ्यांवर अन्यायकारक होणाऱ्या वागणुकीबाबत विरोधकांनी सभागृहामध्ये देखील मोठ्या आवाजात निषेध केला. यामध्ये त्यांनी चौकीदार चोर आहे, नरेंद्र मोदी हाय हाय या घोषणांनी महापोलीचे तेवढे यांना देखील प्रश्न विचारले. त्यावर महापौर रितू तावडे यांनी पंतप्रधान नरेंद्र मोदी विद्यार्थ्यांना न्याय देण्यासाठी सक्षम आहे असे प्रत्युत्तर दिले.  त्यावर सभागृहात एकच गोंधळ उडाला. परंतु महापौर रितू तावडे यांनीसभागृहाचे कामकाज सुरूच ठेवले. या आंदोलनामध्ये शिवसेना उबाठा पक्षाचे नगरसेवक निशिकांत शिंदे, किरण तावडे, राजोल पाटील, विरोधी पक्ष नेत्या किशोरी नपेडणेकर, मनसे आणि काँग्रेसचे नगरसेवक उपस्थित होते.